पोखरा, १३ माघ । पोखरा आउदै गरेको यात्रुबाहक बसको ठक्करबाट स्याङ्जाको पुतलीबजारमा एक जनाको ज्यान गएको छ ।
बुटवलबाट पोखरा आउदै गरेको ना ४ ख ३८२८ नम्बरको बसले पुतलीबजार ११ करेण्डाँडामा शुक्रबार साँझ ठक्कर दिँदा पैदल यात्री ७२ वर्षीय यामबहादुर जिटीको मृत्यु भएको प्रहरीले जनाएको छ ।
साँझ ६ः३० बजे बाटोमा हिडिरहेका जिटीलाई बसले ठक्कर दिँदा घटनास्थलमै मृत्यु भएको जिल्ला प्रहरी कार्यालय स्याङ्जाका सूचना अधिकारी पदमबहादुर थापाले जानकारी दिए ।
ठक्कर दिने बस तथा चालकलाई प्रहरीले नियन्त्रणमा लिएको छ । घटनापछि स्थानीयले सडक अवरुद्ध गरेका छन् ।